Total Pageviews

Friday, July 12, 2013

సంగడికి రాగదవే సరిచూచేను - యింగిత మెరుగుకుంటే నిద్దరికిగూడెను

//ప// సంగడికి రాగదవే సరిచూచేను
యింగిత మెరుగుకుంటే నిద్దరికిగూడెను

//చ// తుంమిదలు వ్రాయబోతే తొయ్యలి నీ తురుమాయ
నెమ్మిజందురు వ్రాసితే నీమోమాయనే
వుమ్మడి సంపెంగ వ్రాయనున్నతి నీ నాసికమాయ
కమ్మగలువలు వ్రాయగన్నులాను

//చ// గక్కన శంఖము వ్రాయ గన్నెరో నీగళమాయ
జక్కవల వ్రాయగా నీ చన్నులాయను
అక్కరదామరలు వ్రాయగ నీకరములాయ
నిక్కి సింహము వ్రాయగా నీ నడుమాయను

//చ// పులిసము వ్రాయగాను పొలతి నీ పిరుదాయ
తెలియ నరటుల వ్రాసితే దొడలాయ
కలసితివి శ్రీవేంకటేశ్వరుడను దాను
బలుచిగురులు వ్రాయ బాదాలాయను

ముఖ్యపదార్ధం:
సంగడి= స్నేహము
ఇంగితము= గుర్తులు, జ్ఞానము
తొయ్యలి= స్త్రీ
నెమ్మి చందురు= గుండ్రని చంద్రుడు
గళము= కంఠము
జక్కవలు= జక్కవ పక్షి (The poetical swan, always described as being in pairs, to which poets liken fair breasts)
పులినము= చక్రము??

భావం:
శ్రీ వేంకటేశ్వరుడు తన ప్రేయసితో ఇలా అడుగుతున్నారట. 

నాతో స్నేహం చెయ్యవే నీ లక్షణాలను సరిచూస్తాను. వాటి గురించి తెలుసుకుంటే మన ఇద్దరికీ జంట కుదురుతుంది. 

నల్లని నీ కొప్పు తుమ్మిదలు రెక్కలతో రాసాయా అన్నట్టుగా నల్లగా ఉన్నాయి. నీ ముద్దైన ముఖము గుండ్రని చంద్రుడు రాసాడా అన్నట్టు గుండ్రంగా ఉం ది. నీ ముక్కు సంపెంగె మొగ్గ రాసిందా అన్నట్టు కోటేరు ముక్కులా నిటారుగా ఉంది. నీ కన్నులు నల్లని కలువలు రాసాయా అన్నట్టు గా నిగనిగలాడుతూ నల్లగా ప్రశాంతంగా ఉన్నాయి . 

ఓ యౌవ్వనవతీ! నీ కంఠం చక్కని శంఖము రాసిందా అన్నట్టు మూడు గీతలతో చెక్కినట్టుంది. నీ జంట చన్నులు జక్కవ పక్షులు రాసాయా అన్నట్టు గుండ్రంగా ఉబ్బి ఉన్నాయి. నీ చేతులు ఎర్రని తామెరలు రాసాయా అన్నంత ఎర్రగా ఉన్నాయి. సన్నని నీ నడుము ఉన్నతమైన సింహము రాసిందా అన్నంత సన్నగా ఉంది. 

నీ పిరుదులు చక్రాలతో రాసినట్టుగా గుండ్రంగా ఉనాయి. నీ పిరుదులు లావైన అరటి బోదెలతో రాసినట్టుగా బలంగా, నున్నగా ఉన్నాయి. నీ పాదాలు ఎర్రని లేత చిగురులతో రాసినట్టుగా ఎర్రగా ఉన్నాయి. ఇటువంటి నీవు శ్రీవేంకటేశుడనే నాతో కలిశావు. మనిద్దరికీ జంట బాగా కుదురుతుంది.